Artzai Gaztako bazkideak diren Marta Perez Loperena “LOPERENA” (Egozkue-Nafarroa) eta  Ander Barandiaran “GAZTAINADITXULO” (Idiazabal-Gipuzkoa), finalistak izan dira Espainiako Gazta Onenen Txapelketako 13. edizio honetan, "esne gordineko ardi gazta erdi-onduaren" kategorian.
Lehiaketa hau IFEMA-Madrilen egingo da, Gourmets Aretoaren 36. edizioan, eta estatuan egiten direnen artean garrantzitsuenetako bat izango da. 800 gazta baino gehiago aurkezten dira eta itsu-itsuan dastatzen dira, gaztaren sektore guztietako profesionalak biltzen dituen 60 epailez osatutako panel baten bidez: teknikariak, gaztagile maisuak, dendetako arduradunak, blogariak, kazetari gastronomikoak eta sukaldariak.

Finalerdian erabakitako lehen hautaketaren ondoren, 100 gazta finalistak aukeratzen dira (5 kategoria bakoitzeko) eta guztiak Gaztaren Tunelean dastatu ahal izango dira, apirilaren 17tik 20ra, 36. Gourmet Aretoan, Espainiako Gazta Onena aukeratzen denean.

Zorionak eta zorte on bioi finalean!