Artzai Gaztako bazkideak diren BENGOTXEA-ETXELEKUA (Urdazubi-Urdax), SAT OLANO-EGINOKO ARTZAIA (Egino), LA LEZE (Ilarduia), KORTARIA-INFERNUKO GASNA (Lekaroz), eta JOSEBA INSAUSTI-OTATZA (Ordizia) hainbat izar lortu dituzte "Great Taste 2026" nazioarteko sarietan Idiazabal Baserrikoa Artzai Gaztarekin.

Mundu osoko milaka elikagai bildu dira 1994tik Londresen egiten den "Great Taste" lehiaketa ospetsuan.

Elikaduraren "OSCARS" sari gisa hartzen dira, eta "Guild of Fine Food" delakoak antolatzen ditu. Aurkeztutako milaka produktuak kategoria desberdinetan sailkatzen dira, eta hainbat kata itsuetan baloratu dira, 500 adituk baino gehiagok parte hartu dutelarik; zaporean oinarritutako munduko saririk handiena da.

Artzai Gazta Idiazabal Baserrikoako gaztategiak: BENGOTXEAk (Urdazubi-Urdax), hiru izar bere ETXELEKUA gaztarekin eta izar bat bere BENGOTXEA gaztarekin lortu ditu,  SAT OLANOk “EGINOKO ARTZAIA” (Egino) bi izar gazta naturalarekin lortu ditu, LA LEZEk (ILarduia) izar bat gazta naturalarekin eta beste bat gazta ketuarekin, SC KORTARIAk “INFERNUKO GASNA” (Lekaroz) izar bat gazta naturalarekin eta JOSEBA INSAUSTIk “OTATZA”(Ordizia), gazta ketuarekin izar bat. 

Gaztategi hauek bakoitzak bere larreetan bazkatzen duten etxeko Latxa artaldeko esne gordina erabiliz egiten dute gazta.

Hauek guztiak Idiazabal Jatorri Izendapenaren barne daude eta familia hauek belaunaldiz belaunaldi lan egiteko era eta jakituria transmititzen jakin izan dute. Hainbat alditan sarituak izan dira, bai bertako zein nazioarteko lehiaketa ospetsuetan gure gazten izen ona mugaz bestalde zabalduz.

Artzai Gaztatik gaztategi hauek zoriondu nahi ditugu. Harro sentitzen gara gure gaztak nazioarte mailan goi mailako adituek horrelako lehiaketetan aukeratuak izateagatik. Gure ustetan honek, beste behin, artzai eta gaztagileen ahalegina, ilusioa eta lan ona goraipatzen du.